♥دم درود اور تعویزات کی شرعی حیثیت♥

⊙بِسّمِ اللَّہِ الرّ حمٰنِ الرَّحیم⊙

تمام تعریفیں اُس اللہ تعالیٰ کے لیے جس نے سب جہانوں کو صرف چھ 6 دن میں پیدا کیا اور اُس سبحان اور اعلٰی ذات کو زرہ سی بھی تھکان نہیں ہوئی اور درود و سلام اور ہزاروں لاکھوں کڑوروں انگنت رحمتیں اور برکتیں نازل ہوں محمد علیہ السلام پر اُن کی آل پر اور صحابہ اکرام رضی اللہ تعالٰی عنہم پر۔

 ♥دم درود اور تعویزات کی شرعی حیثیت♥

بعض شیطانی قوتیں ہر وقت یہی سوچتی اور منصوبہ بندی کرنے میں مصروف رہتی ہیں کہ اختلافات و تعصبات کی ماری ہوئی اس امت کو کہاں کہاں مذہبی، سیاسی اور مسلکی تنازعات میں الجھانے کے امکانات ہیں۔ چنانچہ وہ مذہب و مسلک کے نام پر اور کبھی سیاست و ثقافت کے نام پر صرف عوام ہی نہیں بلکہ نام نہاد خواص کو بھی گمراہ کرنے میں کامیاب ہو جاتے ہیں۔ جھوٹے پروپیگنڈا سے سچ کو جھوٹ اور جھوٹ کو سچ کر دیکھاتے ہیں۔

دنیا میں موت و حیات اور صحت و بیماری کا سلسلہ ساتھ ساتھ چلتا ہے۔ بیماری بھی اﷲ ہی پیدا کرتا ہے اور صحت و شفاء بھی اُسی کے ہاتھ میں ہے۔ اُسی نے ہمیں دواء و علاج کا حکم دیا ہے اور اُسی نے دواؤں میں اثر رکھا ہے۔ جس طرح دواؤں میں شفاء کا اثر رکھا ہے اسی طرح دُعاء اور دم درود میں بھی شفاء کا اثر رکھا ہے۔ دواؤں اور دعاؤں میں وہ چاہے تو شفاء ہے نہ چاہے تو کچھ نہیں۔ ہر دواء میں ہر وقت ہر ایک کیلیے شفاء ہی ہوتی تو ہسپتالوں سے علاج کے بعد شفایاب ہو کر ہی نکلتا، کسی کی میت گھر نہ پہنچتی۔ یہی حال دم درود اور جھاڑ پھونک کا ہے۔ جیسے صحیح تشخیص کے بعد معیاری دواؤں کے استعمال سے امید کی جا سکتی ہے کہ مریض شفایاب ہو اسی طرح اﷲ تعالیٰ کے نام و کلام سے کسی بیمار کو کسی بھی بیماری سے شفایاب ہونے کے لیے قرآن و حدیث میں موجود پاک کلام سے جھاڑ پھونک یعنی دم کرنے سے مریض کے شفایاب ہونے کی قوی امید کی جا سکتی ہے۔ شفاء دینا، نہ دینا اس کا کام ہے۔ چارہ علاج کرنا ہمارا کام ہے۔ جیسے طبی طریقہ ہائے علاج اختیار کرنے میں کوئی کسی کو طعن و طنز نہیں کرتا۔ اﷲ کے نام و کلام سے دم کرنے کے طریقہ علاج پر زبان طعن و تشنیع دراز کیوں کی جائے ؟

اچھے بُرے کلمات میں اثر کا کون انکار کر سکتا ہے؟ جَزاکَ اﷲ خَيْرًا، السَّلَامُ عَلَيْکُمْ. بھی کلام ہے جس کے سننے والے کہنے والے پر خوشگوار اثرات پڑتے ہیں۔ لعنتی، خبیث، شیطان بھی کلام ہے جس کے سننے والے پر بُرے اثراث مرتب ہوتے ہیں۔ یونہی کسی بیمار پر کلماتِ طیّبات جن کا معنٰی و مفہوم بھی جانتا ہے جن میں کفر و شرک کا مفہوم بھی نہیں پایا جاتا۔ اگر پڑھ کر کسی بیمار کو جھاڑا جائے۔ پانی دودھ وغیرہ پر دم کر کے اُسے استعمال کیا جائے۔ اس میں کیا حرج ہے؟ اس میں کونسا کفر و شرک پایا جاتا ہے۔ یہ تو اﷲ تعالیٰ، ملائکہ اور انبیاء و اولیاء کا طریقہ حقہ ہے۔ پھر اس کے خلاف محاذ آرائی اور مخالفت فی سبیل اﷲ فتنہ و فساد نہیں تو کیا ہے؟ یہ جہالت و تعصب نہیں تو کیا ہے ؟اسے بدعت و شرک کہا جائے تو ہمیں بتایا جائے کہ پھر توحید و سنت کیا ہے ؟اس مضمون میں اسی کی تشریح و توضیح کی گئی ہے۔

♥لغوی تحقیق♥

قال ابن الأثير : الرُّقْيَةُ العُوذة الّتی يُرْقیٰ بها صاحبُ الآفةِ کالحُمَّی والصَّرَع وغير ذلک من الآفات، و قد جاء فی بعض الأَحاديث جوازُها و فی بعضِها النَّهْيُ عنها.

ابن اثیر الجوزی نے کہا’’رُقْيَۃُ‘‘وہ دُعا جس سے مصیبت زدہ کو جھاڑا جائے۔ مثلاً بخار، بے ہوشی وغیرہ، آفات۔ بعض احادیث میں اس کا جواز اور بعض میں ممانعت آئی ہے۔

فمنَ الجواز قوله : استَرْقُوا لَها فاِنَّ بها النَّظْرَة، أی اطْلبُوا لها من يَرْقِيها.

’’جواز کی ایک مثال رسول اﷲ صلی اللہ علیہ وآلہ وسلم کا یہ فرمان ہے : اسے جھاڑ پھونک کرو اس عورت کو نظربد لگ گئی ہے، مطلب یہ کہ اس کے کوئی جھاڑ پُھونک کرنیوالا تلاش کرو!‘‘ اور ممانعت کی ایک مثال یہ ہے :

لا يَسْتَرْقُون ولا يَکْتَوُون.

 ’’نیک لوگ نہ جھاڑ پھونک کریں نہ داغیں۔‘‘

♥احادیث کے مابین مطابقت♥

جھاڑ، پھونک اوردم درود کی تائید اور مخالفت میں متعدد احادیث وارد ہوئی ہیں۔ دونوں اطرف کی ان احادیث میں مطابقت یوں کی جا سکتی ہے کہ وہ جھاڑ پھونک مکروہ ہے : (1)جو عربی زبان میں نہ ہو (2) اﷲ تعالیٰ کے مقدس ناموں سے اس کی صفات اور کلام سے نہ ہو، اس کی نازل کردہ کتابوں میں نہ ہو اور عقیدہ یہ رکھا جائے کہ دم درود لازمی فائدہ دیگا اور اسی پر توکل کر لیا جائے۔ یہی مطلب فرمان پاک کا ہے :

ماتوکّلم من استرقیٰ.

’’جس نے جھاڑ پھونک کیا اس نے توکل نہیں کیا‘‘

اس کے خلاف جو جھاڑ پھونک ہے وہ مکرہ نہیں :

کالتعوّذ بالقرآن وأَسمآء اﷲ تعالٰی والرَُّقَی المَرْوِيَةِ.

’’جیسے قرآن کریم اور اﷲ تعالیٰ کے اسمائے مقدسہ اور اس کی صفات اور اس کی نازل کی گئی کتابوں میں جو کلام پاک ہے اور جو دم جھاڑ حدیث پاک میں مروی ہے۔‘‘

اسی لیے سرکار صلی اللہ علیہ وآلہ وسلم نے اس صحابی سے جنہوں نے قرآن کریم سے جھاڑ پھونک کی تھی اور اس پر اجرت بھی لی تھی، فرمایا : ’’وہ لوگ بھی تو ہیں جو باطل جھاڑ پھونک پر اجرت لیتے ہیں، تم نے تو برحق دم کر کے اجرت لی (مَنْ أخَذ برُقْية باطِلٍ فقد أَخَذْت بِرُقْية حَقٍّ)‘‘اور جیسے حضور کا یہ فرمان جو حدیث جابر میں ہے سرکار صلی اللہ علیہ وآلہ وسلم نے فرمایا :

اعْرِضُو ْهَا عَلَيَ فعرَضْناها فقال لا باْس بها اِنما هی مواثِيقُ. کأَنّه خاف أَن يقع فيها شيی ممّا کانوا يتلفظون به و يعتقدونه من الشرک فی الجاهلية وما کان بغير اللسان العربی ممّا لا يعرف له ترجمته ولا يمکن الوقوف عليه فلا يجوز استعماله.

’’وہ دم جھاڑ میرے سامنے لاؤ ! ہم نے پیش کر دیا فرمایا کوئی حرج نہیں یہ تو وعدے معائدے ہیں۔ گویا حضور صلی اللہ علیہ وآلہ وسلم کو ڈر تھا کہ کہیں دم میں کوئی ایسا حرف نہ ہو جسے وہ بولا کرتے اور جس شرک کا دورِ جاہلیت میں عقیدہ رکھتے تھے یا جو عربی زبان میں نہ ہو جس کا ترجمہ نہ آئے اور نہ اس کا مفہوم تک پہنچنا ممکن ہو ایسا دم جائز نہیں۔ رہا سرکار کا یہ فرمان کہ : ’’نظربد اور بخار کے علاوہ کسی اور مقصد کیلیے دم درود نہیں‘‘ تو اس کا مطلب یہ ہے کہ اس دم سے بڑھ کر کوئی دم بہتر اور نفع دینے والا نہیں۔ اور حضور صلی اللہ علیہ وآلہ وسلم نے ایک سے زائد صحابہ کرام کو جھاڑ پھونک کا حکم دیا۔ اور ایک بڑی جماعت کے بارے میں سنا کہ وہ جھاڑ پھونک کرتے تھے اور آپ نے ان پر انکار نہیں فرمایا۔ الخ

  [علامه ابن منظور افريقی، متوفی711ه، لسان العرب، 5 : 294، طبع بيروت]

    [علامه سيد مرتضي الحسينی الواسطی الزبيدی الحنفی، تاج العروس شرع القاموس، 10 : 154، طبع بيروت]

♥احادیث مقدسہ کی روشنی میں♥

1۔ حضرت ابوھریرہ رضی اﷲ عنہ سے روایت ہے رسول اﷲ صلی اللہ علیہ وآلہ وسلم نے فرمایا :

ما أنزل اﷲ داء اِلَّا أنزلَ له شفاء.

’’اﷲ تعالیٰ نے کوئی ایسی بیماری نہیں اتاری جس کے لیے شفاء نہ اتاری ہو۔‘‘

 [بخاری، المتوفی 256ه، الصحيح، 5 : 2151، کتاب الطب، رقم : 5354، دار ابن کثيراليمامة. بيروت، سن اشاعت 1987ء]

    [ابن ماجه، المتوفی 275ه، السنن، 2 : 1138، کتاب الطب، باب لمريض يشتهی الشی، رقم : 3439، دارلفکر. بيروت]

    [بزار، المتوفی 292ه، المسند، 4 : 282، رقم : 1450، مؤسسة علوم القرآن، بيروت، سن اشاعت 1409ه]

2۔ حضرت جابر رضی اﷲ عنہ سے مروی ہے رسول اﷲ صلی اللہ علیہ وآلہ وسلم نے فرمایا :

لِکُلِّ دائٍ دواءٌ، فاذا اُصِيْبَ دواءٌ برَأ باذن اﷲ عزوجل.

’’ہر بیماری کیلیے دواء ہے جب دواء بیماری کو پہنچتی ہے، بیماری اﷲ عزوجل کے حکم سے ٹھیک ہو جاتی ہے۔‘‘

    [مسلم، المتوفی 261ه، الصحيح، 4 : 1729، رقم : 2204، داراحياء التراث العربي. بيروت]

    [حاکم، المتوفی 405ه، المستدرک، 4 : 445، رقم : 8219، دارلکتب العلمية. بيروت، سن اشاعت 1990ء]

    [ابن حبان، المتوفی 354ه، الصحيح، 13 : 428، رقم : 6063، مؤسسة الرسالة. بيروت، سن اشاعت 1993ء]

    [بيهقی، المتوفی 458ه، السنن الکبری، 9 : 343، رقم : 19342، مکتبة دار الباز مکة المکرمة، سن اشاعت 1994ء]

    [حميدی، المتوفی 488ه، الجمع بين الصحيحين، 2 : 386، رقم : 1627، دار ابن حزم لبنان. بيروت، سن اشاعت 2002ء]

3۔ حضرت انس رضی اﷲ عنہ سے روایت ہے :

 رخَّصَ رَسُوْلُ اﷲ صلی الله عليه وآله وسلم فِی الرُّقْيَةَ مِنَ العين وَالحُمَةِ والنَّمْلة.

’’رسول اﷲ صلی اللہ علیہ وآلہ وسلم نے تین چیزوں کیلیے جھاڑ پھونک کی اجازت دی

(1) نظربد

(2) بچھو وغیرہ کے کاٹے پر

(3) پھوڑے پھنسی کیلیے۔‘‘

    [مسلم، الصحيح، 4 : 1725، رقم : 2196]

    [حميدی، الجمع بين الصحيحين، 2 : 655، رقم : 2164]

    [نسائی، المتوفی 303ه، السنن، 4 : 366، رقم : 7541، دارالکتب العلمية. بيروت، سن اشاعت 1991ء]

    [ابن ابی شيبه، المتوفی 235ه، المصنف، 5 : 43، رقم : 23536، مکتبة الرشد. الرياض، سن اشاعت 1409ه]

    [احمد بن حنبل، المتوفی 241، المسند، 3 : 118، رقم : 12194، مؤسسة قرطبة. مصر]

4۔ امّ المؤمنین سیدہ عائشہ صدیقہ رضی اﷲ عنہا سے روایت ہے :

 أن رسول اﷲ صلی الله عليه وآله وسلم کان يأمرها أن تسترقی من العين.

’’کہ رسول صلی اللہ علیہ وآلہ وسلم ان (حضرت عائشہ صدیقہ رضی اﷲ عنہا) کو نظربد سے بچنے کیلیے جھاڑ پھونک کا حکم دیا کرتے تھے۔‘‘

متفق علیہ

   [بخاری، الصحيح، 5 : 2166، رقم : 5406]

    [مسلم، الصحيح، 4 : 1725، رقم : 2195]

    [ابن ماجه، السنن، 2 : 1161، رقم : 3512]
    [هندي، المتوفی 975ه، کنزالعمال، 7 : 51، رقم : 18369، دارالکتب العلمية. بيروت، سن اشاعت 1998ء]

5۔ امّ المؤمنین سیدہ ام سلمہ رضی اﷲ عنہا سے روایت ہے :

انَّ النّبیّ صلی الله عليه وآله وسلم رَأی فی بيتها جاريةً فی وَجْهِهَا سَفْعَةً فقال اِسْتَرْقُوْا لها فانّ بها النظرة.

’’نبی کریم صلی اللہ علیہ وآلہ وسلم نے ان کے گھر ایک لڑکی دیکھی جس کا چہرہ زرد تھا۔ فرمایا : اسے جھاڑ پھونک کرو، اسے نظر لگ گئی ہے۔‘‘

متفق علیہ

   [بخاری، الصحيح، 5 : 2167، رقم : 5407]

    [مسلم، الصحيح، 4 : 1725، رقم : 2197]

    [حاکم، المستدرک، 4 : 236، رقم : 7486]

    [حميدی، الجمع بين الصحيحين، 4 : 228، رقم : 3441]

6۔ حضرت جابر رضی اﷲ عنہ سے روایت ہے :

نهٰی رسُولُ اﷲ صلی الله عليه وآله وسلم عنِ الرُّقی، فجاء آل عمرو بن حزم اِلی رسول صلی الله عليه وآله وسلم فقالوا يارسول اﷲ اِنّه کانت عندنا رقيةً نرقی بها من العقرب وانک نهيت عن الرقی قال فَعَرضُوْهَا عليه فقال ما أری بأسا من استطاع منکم أنْ ينفعَ اُخاه فَلْيَنْفَعْهُ.

’’رسول اﷲ صلی اللہ علیہ وآلہ وسلم نے جھاڑ پھونک سے منع فرمایا، عمرو بن حزم کے خاندان والوں نے حاضر خدمت ہو کر عرض کی یا رسول اﷲ ! ہمارے پاس ایک دم (ورد) تھا، جس سے ہم بچھو کے کاٹے کو جھاڑتے تھے اور آپ نے جھاڑ پھونک سے منع فرما دیا ہے، ان لوگوں نے وہ ورد وظیفہ سرکار کے سامنے پیش کیا، فرمایا مجھے تو اس میں کوئی خرابی نظر نہیں آتی، تم میں جو کوئی اپنے بھائی کو نفع پہنچا سکے اسے ضرور نفع پہنچائے۔‘‘

    [مسلم، الصحيح، 4 : 1726، رقم : 2199]

    [احمد بن حنبل، المسند، 3 : 315، رقم : 14422]

7. عوف بن مالک الاشجعی سے روایت ہے : ہم لوگ دور جاہلیت میں جھاڑ پھونک کرتے تھے :

فَقُلْنَا يارَسُولَ اﷲ کَيْفَ تَری فِيْ ذٰلک؟

’’تو ہم نے عرض کی یا رسول اﷲ آپ کا اس کے بارے میں کیا خیال ہے؟‘‘

فرمایا :

اِعْرِضُوْا عَلَيَ رُقاکم، لَا بأسَ بالرُّقیٰ ما لَمْ يکُنْ فِيْهِ شِرکٌ.

’’اپنا جھاڑ پھونک مجھ پر پیش کرو (پھر فرمایا) جب تک شرک نہ ہو جھاڑ پھونک میں حرج نہیں۔‘‘

    [مسلم، الصحيح، 4 : 1727، رقم : 2200]

    [حاکم، المستدرک، 4 : 236، رقم : 7485]

    [حميدی، الجمع بين الصحيحين، 3 : 452، رقم : 2974]

    [بيهقی، السنن، 9 : 349، رقم : 19380]

    [عبد اﷲ بن وهب، المتوفی197ه، الجامع فی الحديث، 2 : 792، رقم : 714، دارابن الجوزی السعودية، سن اشاعت 1996ء]

    [طبرانی، المتوفی 360ه، المعجم الکبير، 18 : 49، رقم : مکتبة الزهراء، الموصل 1983ء]

8. عن الشفاء بنت عبد اﷲ قالت دخل علٰی رسول اﷲ صلی الله عليه وآله وسلم و أنا عند حفصة فقال لي الا لتُعَلِّميْنَ هٰذه رقية النملة کما عَلَّمْتِيها الکتابة.

’’سیدہ شفاء بنت عبد اﷲ سے روایت ہے میں ام المؤمنین سیدہ حفصہ رضی اﷲ عنہا کے پاس تھی، رسول اﷲ صلی اللہ علیہ وآلہ وسلم تشریف لائے۔ فرمایا : شفاء ! بی بی حفصہ کو پھوڑے پھنسی کا دم کیوں نہیں سکھاتیں ؟ جیسے تم نے اسے لکھنا سکھایا۔‘‘

    [أبوداؤد، المتوفی 275ه، السنن، 4 : 11، رقم : 3887، دارالفکر]

    [احمد بن حنبل، المسند، 6 : 372، رقم : 27140]

    [هندی، کنزالعمال، 10 : 25، رقم : 28359]

9. حضرت عثمان بن عبد اﷲ بن موھب سے مروی ہے :

 أرْسَلَنِی أَهْلِی اِلٰی أُمِّ سَلَمَةَ بِقَدَحٍ مِنْ مَاءٍ وَقَبَضَ اِسْرَائِيلُ ثَلَاثَ أَصَابِعَ مِنْ فِضَّةٍ، فِيهِ شَعَرٌ مِنْ شَعَر ِالنَّبِی ِّصلی الله عليه وآله وسلم وَ کانَ اِذَا أَصَابَ الْاِنْسَانَ عَيْنٌ أَوْ شَيْئٌ بَعَثَ اِلَيْهَا مِخْضَبَهُ فاطَّلَعْتُ فی الجُلْجُلِ فَرَأَيْتُ شَعَرَاتٍ حُمْرًا.

’’میرے گھر والوں نے ایک پیالے میں پانی ڈال کر مجھے ام المؤمنین ام سلمہ رضی اﷲ عنہا کی خدمت بھیجا اسماعیل نامی راوی نے تین انگلیوں کے ذریعے اشارہ کر کے بتایا کہ وہ اتنا چھوٹا تھا۔ اس میں نبی کریم صلی اللہ علیہ وآلہ وسلم کا ایک بال مبارک موجود تھا۔ جب کسی شخص کو نظر لگ جاتی یا کوئی شخص بیمار ہو جاتا تو وہ اپنا برتن سیدہ اُم سلمہ رضی اﷲ عنہا کی خدمت میں بھیج دیتا اور وہ اس بال مبارک کو اس پانی میں ڈبو دیتی تھیں، میں نے پیالے میں جھانک کر دیکھا تو مجھے اس میں کچھ سرخ بال نظر آئے۔‘‘

1.بخاری، الصحيح، 5 : 2210، رقم : 5557]

10۔ سیدہ عائشہ صدیقہ رضی اﷲ عنھا سے روایت ہے :

 أنّ النّبی ّصلی الله عليه وآله وسلم کانَ ينفث علٰی نفسه فی المرض الّذی مات فيه بالْمُعَوِذاّتِ. فلمّا ثقَل کُنْتُ أنفث عليه بهنّ واَمْسَحُ بيد نفسه لبرکتها فسألت الزّهری کيف ينفث؟ قال کانَ يَنْفِثُ علٰی يديه ثم يَمْسَح بهما وجهه.

’’نبی کریم صلی اللہ علیہ وآلہ وسلم اپنی مرض موت میں معوّذات (سورہ خلق، سورہ الناس) پڑھ کر اپنے اوپر دم فرماتے تھے۔ جب کمزور ہو گئے تو وہی کلمات پڑھ کر میں دم کرتی تھی اور میں حصول برکت کیلیے آپ سرکار کے ہاتھ مبارک چُھوتی۔ معمر کہتے ہیں میں نے امام زہری رحمہ اﷲ سے پوچھا حضور اپنے اوپر کیسے دم کرتے تھے؟ انہوں نے کہا حضور صلی اللہ علیہ وآلہ وسلم اپنے مبارک ہاتھوں پر دم کر کے چہرہ اقدس پر مل لیتے تھے۔

[بخاری، الصحيح 5 : 2165، رقم : 5403]

♥امام بخاری رحمہ اﷲ نے صحیح بخاری میں : الرُّقیٰ بفاتحۃ الکتاب ’’فاتحہ سے دم کرنا‘‘ کے عنوان سے باقاعدہ ایک باب قائم کیا ہے۔

11۔ ابو سعید خدری رضی اﷲ عنہ سے روایت ہے :

 أنّ ناسًا من أصحاب النبی صلی الله عليه وآله وسلم أتَوْا علیٰ حيّ مِّنْ أحْياء العرب فلم يقرو هم فبينما هم کذٰلک اِذْ لُدِغ سَيد أوليئِکَ فقالوا هل معکم من دواء أوراقٍ، فقالوا : انّکم لم تَقْرُونا و لانفعلُ حتٰی تَجْعَلُوا لنا جُعْلًا فجعلوا لهم قطيعًا من الشاء فجعل يقرأُ بأم القرآن و يجمع بُزاقه ويتفلُ فبرأ فاُتُوْا بالشاء فقالوا لا ناخذه حتٰی نسأل النّبیّ صلی الله عليه وآله وسلم. فسألوه فضحک و قال مأ ادرٰک أنها رُقْيَة ٌخذوها واضربوا لی بِسَهْمٍ.

نبی کریم صلی اللہ علیہ وآلہ وسلم کے کچھ صحابہ کرام کا قبائل عرب میں سے ایک قبیلہ پر گذر ہوا۔ انہوں نے ان صحابہ کرام کی مہمان نوازی نہ کی۔ اسی اثناء میں ان لوگوں کے سردار کو سانپ یا بچھّو کا ڈنگ لگا۔ بستی والوں نے کہا تمہارے پاس کوئی دواء یا دم کرنے والا ہے؟ صحابہ کرام نے جواب دیا : تم نے ہماری مہمان نوازی نہیں کی (کھانا نہیں کھلایا) ہم (بھی) دم نہیں کریں گے جب تک بکریوں کا پورا ریوڑ ہمیں نہ دو اب ان لوگوں نے بکریوں کا ریوڑ ان حضرات کو دیا حضرت ابو سعید خُدری رضی اﷲ عنہ نے سورہ فاتحہ پڑھ کر دم، جھاڑ شروع کر دیا۔ لعاب دہن جمع کر کے زخم پر لگاتے جاتے۔ وہ شخص ٹھیک ہو گیا۔ بکریوں کا ریوڑ ان کے سپرد کرنے لگے تو صحابہ کرام کہا ہم نبی اکرم صلی اللہ علیہ وآلہ وسلم سے پوچھے بغیر نہیں لیں گے۔ پھر سرکار صلی اللہ علیہ وآلہ وسلم سے پوچھا آپ ہنس پڑے۔ فرمایا : تجھے کیسے پتہ چل گیا کہ یہ دم ہے ؟ لو ! اور میرا حصہ مجھے دو !

[بخاری، الصحيح، 5 : 2166، رقم : 5404]

12۔ ابن عباس رضی اﷲعنہما کی روایت میں اتنا اضافہ ہے :

فکرهوا ذلک وقالوا أخذت علٰی کتاب اﷲ أجرا حتی قدموا المدينة فقالوا يا رسول اﷲ أخذ علی کتاب اﷲ أجرا، فقال رسول اﷲ صلی الله عليه وآله وسلم انّ أحقّ ما أخذتم عليه أجرا کتاب اﷲ.

’’ساتھیوں نے اسے ناپسند کیا اور کہا آپ نے اﷲ کی کتاب پر اجرت لی ہے۔ یہاں تک کہ مدینہ منورہ پہنچے اور کہا یا رسول اﷲ (ابو سعید خدری ) انہوں نے اﷲ کی کتاب ہے۔ اس پر رسول اﷲ صلی اللہ علیہ وآلہ وسلم نے فرمایا : بیشک جس چیز پر تم اجرت لینے کے زیادہ حقدار ہو، وہ اﷲ کی کتاب ہے۔‘‘

1.بخاری، الصحيح، 5 : 2166، رقم : 5405]

2.حميدی، جمع بين صحيحين، 2 : 75، رقم : 1082]

♥یعنی لوگ جادو ! شرکیات، شیطانی ٹونے ٹوٹکے اور جھاڑ پھونک کے ذریعہ پیسہ کماتے ہیں جو باطل اور شیطنت ہے۔ تم نے تو ستھرا سودا کیا۔ قرآن کریم سے دم کیا اور اس پر اُجرت لی جو سیدھا راستہ ہے۔

13۔ سیدہ عائشہ صدیقہ رضی اﷲ عنہا سے روایت ہے :

 أمرنی رسول اﷲ صلی الله عليه وآله وسلم أو أمر أن يسترقیٰ من العين.

’’نبی کریم صلی اللہ علیہ وآلہ وسلم نے مجھے حکم دیا (یا حکم دیا) کہ نظر بد سے بچنے کیلیے دم کیا جائے۔‘‘

[بخاری، الصحيح، 5 : 2166، رقم : 5406]

14۔ اسود بن زید رضی اﷲ عنہ سے مروی ہے :

سأَلت عائشة عن الرُّقْيَة من الْحُمَةِ. فقالت : رخّص النبی صلی الله عليه وآله وسلم الرُّقْيَةَ من کل ذی حُمَة.

’’میں نے سیدہ عائشہ صدیقہ رضی اﷲ عنہا سے سانپ یا بچھو وغیرہ کے کاٹے پر دم کرنے کا پوچھا تو آپ نے فرمایا : رسول اﷲ صلی اللہ علیہ وآلہ وسلم نے ہر بچھو، سانپ وغیرہ کے ڈسے پر دم کرنے کی اجازت دی۔‘‘

   [بخاری، الصحيح، 5 : 2167، رقم : 5409]

15۔ عبد العزیز بن صہیب رضی اﷲ عنہ سے روایت ہے میں اور ثابت بنانی حضرت انس بن مالک رضی اﷲ عنہ کے پاس حاضر ہوئے۔ ثابت نے کہا اے ابوحمزہ (انس کی کُنیت) میں بیمار ہوں۔ حضرت انس نے فرمایا : کیا آپ کو رسول اﷲ صلی اللہ علیہ وآلہ وسلم والا دم نہ کروں ؟ انہوں نے کہا کیوں نہیں۔ انہوں نے یہ دم کیا :

اللّٰهُمَّ رَبَّ النَّاسِ مُذْهِبَ الْبَاس اِشْفِ أنْتَ الشَّافِيْ لَا شَافِيَ اِلَّا اَنْتَ شِفَاءً لَا يُغَادِرُ سَقْمًا.

’’اے اﷲ لوگوں کے پروردگار تکلیف دُور فرمانے والے شفاء عطا فرما، تُو ہی شفاء دینے والا ہے تیرے سوا کوئی شفاء دینے والا نہیں، ایسی شفاء جو کوئی بیماری نہ چھوڑے۔‘‘

    [بخاری، الصحيح، 5 : 2167، رقم : 5410]

    [حميدی، جمع بين صحيحين، 2 : 630، رقم : 2076]

    [بيهقی، الدعوات الکبير، 2 : 296، رقم : 508، منشورات مرکز المخطوطات الکويت، سن اشاعت 1993ء]

16۔ سیدہ عائشہ صدیقہ رضی اﷲ عنہا سے روایت ہے کہ رسول اﷲ صلی اللہ علیہ وآلہ وسلم بعض اہل خانہ کیلیے اس طرح دم کرتے تھے۔ دائیاں ہاتھ مبارک دردکی جگہ رکھ کر یہ دعا پڑھتے :

اللَّهُمَّ رَبَّ النَّاسِ أذْهَبِ الْباَسَ، اشْفِه وَاَنْتَ الشَّافِيْ لَا شَفآءَ اِلَّا شِفَاؤُک شِفَاءً لَا يُغَادِرُ سَقْمًا.

 ’’اے اﷲ ! لوگوں کے پروردگار بیماری ختم فرما اور اسے شفاء عطا فرما، اور تو وہی شفاء بخشنے والا ہے۔ شفاء تو بس تیری شفاء ہے، ایسی شفاء جو بیماری کا نام و نشاں نہ چھوڑے۔‘‘

[بخاری، الصحيح 5 : 2168، رقم؛ 5411]

17۔ سیدہ عائشہ صدیقہ رضی اﷲ عنہا سے روایت ہے رسول اﷲ صلی اللہ علیہ وآلہ وسلم اس طرح دم فرماتے :

اَمْسَحِ الْبَاسَ رَبَّ النَّاسِ بِيَدِکَ الشِّفَآءُ لَا کَاشِفَ لَه اِلَّا أنْتَ.

’’تکلیف دُور فرما پروردگار عالم ! تیرے ہی ہاتھ ہے شفاء اس تکلیف کو تیرے سوا کوئی دور کرنے والا نہیں۔‘‘

    [ابن حبان، الصحيح، 13 : 463، رقم : 6096]

    [حميدی، الجمع بين الصحيحين، 4 : 138، رقم : 3251]

    [عبد اﷲ بن وهب، الجامع فی الحديث، 2 : 784، رقم : 706]

    [اسحاق بن راهويه، المسند، 3 : 1005، رقم : 1744، مکتبة الايمان المدينة المنورة، سن اشاعت1991ء]

    [بيهقی، الدعوات الکبير، 2 : 298، رقم : 510]

18۔ سیدہ عائشہ صدیقہ رضی اﷲ عنہا سے روایت ہے رسول اﷲ صلی اللہ علیہ وآلہ وسلم مریض سے فرماتے تھے :

بِسْم اﷲ تُرْبَة اَرْضِنا برِيْقَة ُبَعْضِنَا يَشْفِيْ سَقِيْمَنَا بَاِذْنِ ربِّنَا.

’’اﷲ کے نام سے یہ ہماری زمین کی مٹی ہے اور ہمارے بعض بزرگوں کا لعاب (تھوک) یہ شفاء بخشے گا ہمارے بیمار کو، ہمارے رب کے حکم سے‘‘

متفق علیہ

    [بخاری، الصحيح، 5 : 2168، رقم : 5413]

    [مسلم، الصحيح، 4 : 1724. رقم : 2194]

    [حاکم، المستدرک، 4 : 457، رقم : 8266]

    [ابن حبان، الصحيح، 7 : 238، رقم : 2973]

    [حميدی، الجمع بين الصحيحين، 4 : 171، رقم : 3306]

    [نسائی، المتوفی 303ه، السنن، 4 : 368، رقم : 7550، دارالکتب العلمية. بيروت، سن اشاعت 1991ء]

    [ابن ماجه، السنن، 2 : 1163، رقم : 3521]

    [ابن ابی شيبة، المصنف، 5 : 46، رقم : 23569]

    [عبداﷲ بن الزبير، المتوف219ه، المسند، 1 : 123، رقم : 252، دارلکتب العلمية مکتبة المتنبی بيروت. قاهره]

    [أبويعلی، المتوفی307ه، المسند، 8 : 40، رقم : 4550، دارالمأمون للتراث. دمشق، سن اشاعت 1984ء]

    [احمد بن حنبل، المسند، 6 : 93، رقم : 24661]

    [هندی، کنزالعمال، 10 : 44، رقم : 28535]

19۔ ام المؤمنین سیدہ عائشہ صدیقہ رضی اﷲ عنہا سے روایت ہے رسول اﷲ صلی اللہ علیہ وآلہ وسلم جب اپنے بستر پر تشریف لاتے :

نَفَثَ فِيْ کَفَّيهِ بقُلْ هُوَ اﷲُ أحَدٌ و بالمعوّذتَيْنِ جَمِيْعًا ثمّ يَمْسَحُ بِهِما وَجْهَه وَمَا بَلَغَتْ يَدَاهُ مِنْ جَسَدِه، قالَت عائشةُ : فلَمَّا اشْتَکٰی کانَ ياَمْرُنِيْ اَنْ اَفْعَلَ ذٰلکَ بِه.

’’تو قُلْ ھُوَ اﷲ اَحَدٌ (سورہ اخلاص) اور مُعوّذتَيْن (آخری دو سورتیں) پڑھ کر دونوں ہاتھوں پر دم کرتے پھر دونوں ہاتھوں سے چہرہ اقدس اور جسم اقدس پر جہاں تک ہاتھ مبارک پہنچتے ملتے۔ سیدہ عائشہ صدیقہ رضی اﷲ عنہا فرماتی ہیں : جب رسول اﷲ صلی اللہ علیہ وآلہ وسلم بیمار ہوتے مجھے ویسے ہی دم کرنے کا فرماتے۔‘‘

[بخاری، الصحيح، 5 : 2169، رقم : 5416]

♥امام۔ حاکم نے دم درود کے بارے میں جو احادیث صحیح نقل کی ہیں درج ذیل ہیں :

20. عن عائشة رضی اﷲ عنها قالت : امرنی رسول اﷲ صلی الله عليه وآله وسلم أن أسترقی من العين.

’’ام المؤمنین سیدہ عائشہ صدیقہ رضی اﷲ عنہا سے روایت ہے، فرماتی ہیں : مجھے رسول اﷲ صلی اللہ علیہ وآلہ وسلم نے نظر کا دم (جھاڑ) کرنے کا حکم دیا۔‘‘

صحيح علی شرط شيخين و لم يخرجاه

    [حاکم، المستدرک، 4 : 457، رقم : 8267]

    [حميدی، الجمع بين الصحيحين، 4 : 163، رقم : 3286]

    [نسائی، السنن الکبری، 4 : 365، رقم : 7536]

    [بيهقی، السنن الکبری، 9 : 347، رقم : 19368]

21۔ حضرت ابی بن کعب رضی اﷲ عنہ بیان کرتے ہیں کہ میں رسول اﷲ صلی اللہ علیہ وآلہ وسلم کی خدمت اقدس میں حاضر تھا ایک اعرابی نے حاضر خدمت ہو کر عرض کی یارسول اﷲ ! میرے بھائی کو درد ہے فرمایا کیا درد ہے ؟ عرض کی حضور کچھ ہے فرمایا میرے پاس لاؤ، وہ اسے لائے اور سرکار کے سامنے رکھ دیا، سرور کائنات صلی اللہ علیہ وآلہ وسلم نے سورہ فاتحہ اور سورہ بقرہ کی آخری چار آیتیں اور یہ دو آیتیں : وَاِلٰهُکُمْ اِلٰهٌ وَّاحِدٌ.، لَآ اِلٰهَ اِلَّا هو الرَّحْمٰنُ الرَّحِيْمُ. اور آیۃ الکرسی اور سورہ اٰل عمران کی یہ آیت : شَهِدَ اﷲُ اَنَّهُ لَآ اِلٰهَ اِلَّا هُوَ. اور ایک یہ آیت سورہ الاعراف سے : اِنَّ رَبَّکُمُ اﷲُ الَّذِيْ خَلَقَ السَّمٰوٰت وَالْاَرْضَ اور سورہ المؤمنون کے آخر سے : فَتَعالَی اﷲُ الْمَلِکُ الْحَقُّ. اور سورہ جن کی آیت : وَاِنَّه تَعَالٰی جَدُّ رَبِّنَا مَا اتَّخَذَ صَاحِبَةً وَّ لَا وَلَدًا اور سورہ الاخلاص اور مُعوّذتین پڑھ کر دم کیا تو وہ شخص ایسے اُٹھ کھڑا ہوا جیسے کوئی تکلیف تھی ہی نہیں۔

    [حاکم، المستدرک، 4 : 458، رقم : 8269]

    [هندی، کنزالعمال، 2 : 116، رقم : 3978]

    [بيهقی، الدعوات الکبير، 2 : 313، رقم : 527]

22۔ حضرت سہل بن حنیف فرماتے ہیں ہم سیلاب سے گزرے، میں نے سیلابی پانی میں غسل کر لیا، باہر نکلا تو بخار ہو گیا۔ یہ بات رسول اﷲ صلی اللہ علیہ وآلہ وسلم کی خدمت میں عرض کی گئی، فرمایا :

مُروا ابا ثابت يتعوّذ.

’’ابو ثابت سے کہو جھاڑے‘‘

میں نے عرض کی میرے آقا ! دم جھاڑ ٹھیک کر دے گا؟ فرمایا :

لا رقية الّا فی نَفْسٍ اَوْ حُمّةٍ او لَدْغَةٍ.

’’جھاڑ تو خون، نکسیر، بخار ڈسے پر ہی ہوتی ہے۔

    [حاکم، المستدرک، 4 : 458، رقم : 8270]

    [نسائی، السنن الکبری، 6 : 256، رقم : 10873]

    [ابوداؤد، السنن، 4 : 11، رقم : 3888]

    [احمد بن حنبل، المسند، 3 : 486، رقم : 16021]

    [هندی، کنزالعمال، 10 : 25، رقم : 28362]

23۔ حضرت انس بن مالک رضی اﷲ عنہ کہتے ہیں :

انّ رسول اﷲ صلی الله عليه وآله وسلم کان اذا اصابه رمد او احد من اهله و اصحابه دَعَا بهٰؤلَآءِ الکلمات : اللَّهُمَّ مَتِّعْنِيْ بِبَصْرَيْ واجَعْلَهُ الورث منیّ وارنی فی العدّو ثاری وانصُرنی علٰی مَن ظَلَمنِيْ.

’’جب رسول اﷲ صلی اللہ علیہ وآلہ وسلم یا آپ کے کسی گھر والے اور صحابہ کرام میں سے کسی کی آنکھوں میں آشوب ہو جاتا تو ان کلمات سے دم دعا فرماتے : اے اﷲ میری آنکھ سے مجھے فائدہ دے اور اس کو میرا وارث بنا اور دشمن میں مجھے بدلہ دکھا اور جو مجھ پر ظلم کرے اس کے مقابلہ میں میری مدد فرما۔‘‘ حضرت علی رضی اﷲ عنہ فرماتے ہیں : جو کوئی چھینک کی آواز سن کر یہ پڑھے :

الحمد لِلّٰهِ علٰی کُلِّ حَالٍ.

’’ہر حال میں اﷲ کا شکر ہے۔‘‘

اسے داڑھ اور کان کا درد نہ ہو گا۔

    [حاکم، المستدرک، 4 : 459، رقم : 8272]

   [هندی، کنزالعمال، 7 : 50، رقم : 18365]

24۔ حضرت جابر بن رضی اﷲ عنہا سے روایت ہے کہ عمرو بن حزم انصاری رضی اﷲ عنہ آئے یہ صاحب سانپ کے ڈسے کو (جھاڑ) کرتے تھے :

فقالَ يا رسُولَ اﷲ اِنّکَ نَهَيْتَ عَنِ الرُّقیٰ وَ اَنَا اَرْقِيْ وَ اَنَا اَرْقِيْ مِنَ الْحَيَةِ، قال قَصِّهَا علَیّ فقَصَّهَا عَلَيْهِ فقَال لَا بأسَ بَهٰذِه، هٰذِه مَوَاثِيْقُ قال و جاء خالی من الانصار و کان يرقی من العقرب فقال يا رسول اﷲ انّکَ نهيت عن الرقی و انا ارقی من العقرب، قال من استطاع ان ينفع اخاه فليفعل.

’’عرض کی یا رَسُولَ اﷲ ! آپ نے دم جھاڑ سے منع فرما دیا جبکہ میں سانپ کے ڈسے کو دم کرتا ہوں حضور صلی اللہ علیہ وآلہ وسلم نے فرمایا : وہ دم مجھے پڑھ کر سناؤ۔ انہوں نے پڑھ کر سنایا، فرمایا : اس میں کوئی حرج نہیں یہ تو اﷲ کے وعدے ہیں۔ کہتے ہیں میرے انصاری ماموں آئے وہ بچھو کا دم کرتے تھے، عرض کی یا رسول اﷲ ! آپ نے دم کرنے سے منع فرمایا ہے جبکہ میں بچھو کاٹے کو دم کرتا ہوں۔ فرمایا : جو شخص اپنے بھائی کو فائدہ پہنچا سکتا ہے، پہنچائے‘‘

    [حاکم، المستدرک، 4 : 460، رقم : 8277]

    [حميدی، الجمع بين الصحيحين، 2 : 391، رقم : 1645]

    [نسائی، السنن، 4 : 366، رقم : 7540]

    [عبد اﷲ بن وهب، الجامع فی الحديث، 2 : 781، رقم : 703]

    [ابن ابی شيبه، المصنف، 5 : 41، رقم : 23523]

    [ابويعلی، المسند، 4 : 196، رقم : 2299]

    [احمد بن حنبل، المسند، 3 : 302، رقم : 14269]

25۔ حضرت ابو ہریرہ رضی اﷲ عنہ سے مروی ہے :

مَنْ قال حِيْنَ يمسی أَعُوْذُ بِکَلمَاتِ اﷲِ التَّامَّاتِ مِنْ شَرِّ مَا خَلَقَ.

’’شام کے وقت جو کوئی یہ پڑھے میں پناہ مانگتا ہوں اﷲ کے کامل کلمات کے ساتھ اس کی مخلوق کے شر سے اس رات اسے سانپ نہیں ڈسے گا‘‘

[حاکم، المستدرک، 4 : 461، رقم : 8280]

26۔ قیس بن طلق اپنے باپ سے روایت کرتے ہیں :

 ’’کہ ان کو نبی اکرم صلی اللہ علیہ وآلہ وسلم کے پاس بچھو نے کاٹا حضور صلی اللہ علیہ وآلہ وسلم نے اُسے دم کیا اپنے ہاتھ مبارک سے اس جگہ مس فرمایا‘‘

   [حاکم، المستدرک، 4 : 461، رقم : 8281]

    [طبرانی، المعجم الکبير، 8 : 338، رقم : 8263]

♥جبریل علیہ السلام کا دم کرنا♥

27۔ ام المؤمنین سیدہ عائشہ صدیقہ رضی اﷲ عنہا نے فرمایا :

کان اِذَا اشتکیٰ رسول اﷲ صلي الله عليه وآله وسلم رقاه جبرئيل عليه السلام قال : بِسْمِ اﷲِ يُبْرِيْکَ وَ مِنْ کُلِّ دَاءٍ يَشْفِيْکَ و منْ شَرِّ حَاسِدٍ اِذَا حَسَدَ وَ شَرِّ کُلِّ ذِيْ عَيْنٍ .

’’جبرئیل علیہ السلام آپ کو دم کرتے یوں کہتے۔ اﷲ کے نام سے وہ آپ کو ٹھیک کرے گا ہر بیماری سے آپ کو شفاء دے گا اور حسد کرنے والے کے حسد سے جب حسد کرے اور ہر نظر والے کی نظر بد سے۔‘‘

[مسلم، الصحيح، 4 : 1718، رقم : 2185]

28۔ حضرت ابو سعید خدری رضی اﷲ عنہ سے روایت ہے کہ جبرئیل نے نبی کریم صلی اللہ علیہ وآلہ وسلم کی خدمت اقدس میں حاضر ہو کر عرض کی :

يا مُحَمّد اُشتکيتَ قال نعم.

’’اے محمد صلی اللہ علیہ وآلہ وسلم آپ بیمار ہیں ؟ فرمایا ہاں‘‘

انہوں نے یہ دم پڑھا :

بِسْمِ اﷲ اَرْقِيْکَ مِنْ کلّ شی يُؤْذِيْکَ مِنْ شرّ کُلِّ نَفْسٍ اَوْعَيْنٍ حاسدٍ اﷲ يَشْفِيْکَ بِسْم اﷲ ِاَرْقِيْکَ .

’’اﷲ کے نام سے آپ کو دم کرتا ہوں ہر اس چیز سے جو آپ کو تکلیف دے ہر نفس یا نظر ِحاسد کے شر سے، اﷲ آپ کو شفاء دے، اﷲ کے نام سے آپ کو دم (جھاڑ) کرتا ہوں۔‘‘

    [مسلم، الصحيح، 4 : 1718، رقم : 2186]

    [أبويعلی، المسند، 2 : 327، رقم : 1066]

29. عباده بن الصامت رضی اﷲ عنه يحدث عن رسول اﷲ صلی الله عليه وآله وسلم انّ جبريل عليه الصلٰوة و السَّلَامُ اتَاهُ و هُوَ يُوْعِکُ فقال : بِسْمِ اﷲ أرْقِيْکَ مِنْ کُلِّ شَیٍ يُؤْذِيْکَ من کُلِّ حَسَدٍ وَّ حَاسِدٍ وَ کُلِّ غَمٍّ وَ اِسْمُ اﷲِ يَشْفِيْکَ.

’’رسول اﷲ صلی اللہ علیہ وآلہ وسلم سے یہ حدیث بیان کرتے ہیں کہ جبریل علیہ السلام حضور کی خدمت اقدس میں حاضر ہوئے، اس وقت حضور کو سخت بخار تھا، انہوں نے یہ دم پڑھا : میں اﷲ کے نام سے آپ کو جھاڑتا ہوں، ہر ایسی چیز سے جو آپ کو تکلیف دے ہر حسد اور حسد کرنے والے سے اور ہر غم سے اور اﷲ کا نام آپ کو شفا دے۔‘‘

یہ حدیث شرط شیخین پر صحیح ہے مگر انہوں نے اسے بیان نہیں کیا۔

[حاکم، المستدرک، 4 : 457، رقم : 8268]

♥کون سے دم سے منع فرمایا ؟

30. عن الزهری قال : قدم رسول اﷲ صلی الله عليه وآله وسلم المدنية وهم يَرْقُوْن بِرُقیً يخالطها الشرک، فنهی عن الرّقیٰ، قال : فلُدِغ رجل من أَصحابه، لدغته الحية، فقال النبی صلی الله عليه وآله وسلم : هَلْ مِن رَاقٍ يَرْقِيْه ؟ فقال رجل : اِنی کنتُ اَرْقِی رُقيةً، فلمّا نهيتَ عن الرقیٰ ترکتُها، قال : فاعرضها عليَ، فعرضتها عليه، فلم يرَ بها بأساً فأَمره فرقاه.

’’رسول اﷲ صلی اللہ علیہ وآلہ وسلم مدینہ منورہ تشریف لائے تو وہ لوگ جھاڑ پھونک کرتے جس میں شرک کی آمیزش تھی تو سرکار نے دم کرنے سے منع فرما دیا ایک صحابی کو سانپ نے ڈس لیا حضور علیہ الصلاۃ والسلام نے فرمایا : کوئی دم کرنے والا ہے جو اس شخص کو جھاڑے؟ ایک صاحب نے عرض کی سرکار میں دم جھاڑ کرتا تھا پھر سے آپ سرکار نے منع فرمایا میں نے اسے چھوڑ دیا۔ فرمایا : لاؤ میرے سامنے میں نے سرکار کی خدمت میں پیش کر دیا اس میں کوئی غلط بات نہ پا کر فرمایا : اسے جھاڑو، اس نے سانپ ڈسے کو جھاڑ لیا‘‘

[امام عبدالرزاق الصنعانی، المتوفی 211ه، المصنف، 11 : 16، رقم : 19767، المکتب الاسلامی بيروت، سن أشاعت 1403]

♥31۔ ابن عباس رضی اﷲ عنہما فرماتے ہیں :

کَانَ رسُوْلُ اﷲ صلی الله عليه وآله وسلم يُعَلِّمُنَا مِنَ الْأَوْجَاع کُلِّهَا، ومِنَ الْحُمّٰی هٰذا الدُّعَآءَ، بِسْمِ اﷲِ الْکَبِيْرِ أعُوْذُ بِاﷲِ الْعَظِيْمِ مِنْ شَرِّ عَرَقِ نَعَارِ، ومِنْ شَرِّ حَرِّ النَّارِ.

’’رسول اﷲ صلی اللہ علیہ وآلہ وسلم ہمیں تمام قسم کے دردں اور بخار سے شفاء پانے کیلئے یہ دعا سکھاتے تھے، خدائے بزرگ و برتر کے نام سے میں خدائے بزرگ سے پناہ مانگتا ہوں، رگ سے بہتے خون کے شر سے اور آگ کی تپش کے شر سے‘‘

    [عبدالرزاق، المصنف، 11 : 17، رقم : 19771]

    [عبد بن حميد بن نصر أبو محمد الکسی، المتوفی 249ه، المسند، 1 : 204]

    [حاکم، المستدرک علی الصحيحين، 4 : 459، رقم : 8274]

♥کیا یہ تقدیر و توکل کے خلاف ہے ؟

32۔ صحابہ کرام نے عرض کی یارسول اﷲ !

 رَأيْتَ اتّقاءً نتَّقِيه، ودواءً نتداوی به، ورقیً نسترقی بها، أَتُغْنِيْ منَ الْقَدْر؟ فقال النبی صلی الله عليه وآله وسلم : هِيَ من القدر.

’’آپ کے خیال مبارک میں ہم کسی چیز سے بچاؤ کی تدبیر کرتے ہیں یا کسی تکلیف میں دواء استعمال کرتے ہیں یا کسی دم سے جھاڑ کرتے ہیں، کیا یہ چیزیں ہمیں تقدیر سے بچا لیں گی ؟ نبی کریم صلی اللہ علیہ وآلہ وسلم نے فرمایا : یہ سب کچھ تقدیر ہے‘‘

    [عبد الرزاق، المصنف، 11 : 18، رقم : 19777]

    [احمد بن حنبل، المسند، 3 : 421، رقم : 15510]

    [هندی، کنزالعمال 1 : 182، رقم : 633]

♥شارحین کا تبصرہ♥

●انما قال صلی الله عليه وآله وسلم اضربوا لی معکم بسهم ای بنصيب تطييبًا لقلوبهم و مبالغة فی تعريفهم انه حلال.

’’اپنے ساتھ میرا حصہ نکالو، یہ صرف اس لیے فرمایا کہ ان کے دل خوش ہو جائیں اور ان کی تعریف میں مبالغہ کر کے یہ واضح کرنا تھا کہ یہ جھاڑ پھونک بھی جائز ہے اور اس پر اجرت لینا بھی حلال ہے۔‘‘

[علامه شيخ بدر الدين ابومحمد محمود بن العينی، متوفی 855ه، عمدة القاری شرح بخاری، 21 : 271.272]

♥امام نوی شرح مسلم میں فرماتے ہیں :

●لا مخالفة بل المدح فی ترک الرقی المراد بها الرقی التی هی من کلام الکفار و الرقی المجهولة و التی بغير العربية و ما لا يعرف معناها فهٰذه مذمومة لا حتمال أن معناها کفر أو قريب منه أو مکروه و أما الرقی بِآيات القرآن و بالأذکار المعروفة فلا نهی فيه بل هو سنّّة.

’’حدیثوں میں کوئی اختلاف نہیں بلکہ جن احادیث میں جھاڑ پھونک ترک کرنے کی تعریف ہے اس سے مراد وہ دم ہے جو کافروں کے کلام سے کیا جائے یا مجہول کلمات سے ہو یا غیر عربی ہو یا جن کا معنی کچھ نہ ہو یہ جھاڑ پھونک (گنڈے تعویذ) مذموم ہیں۔ کیونکہ کفر یا اس کے قریب یا مکروہ ہونے کا احتمال ہے۔ رہ گیا قرآنی آیتوں یا مشہور و معروف اذکار سے دم کرنا تو یہ منع نہیں بلکہ یہ تو سنّت ہے‘‘۔ ۔ ۔ و قد نقلوا الاجماع علٰی جواز الرقیٰ بالاٰیات و اذکار اﷲ تعالٰی۔ ’’ائمہ دین نے آیتوں اور اﷲ کے اذکار سے دم کرنے کے جوازپر اجماع نقل کیا ہے۔‘‘

[امام نووی، متوفی 676ھ، شرح مسلم، 2 : 227، باب الطب والمرض ولرقیٰ، طبع لاہور]

♥علامہ ابن القیم کا قول♥

اِذا ثبت أن لبعض الکلام خواص و منافع فما الظّنّ بکلام رب العالمين ثم بالفاتحة التی لم ينزل فی القرآن ولا غيره من الکتب مثلها لتضمنّها جميع معانی القرآن.

’’جب یہ حقیقت ثابت ہے کہ بعض کلام کے خواص اور فائدے ہوتے ہیں، تو رب العالمین کے کلام کے بارے میں کیا خیال ہے، پھر فاتحہ کے بارے میں جس کی مثال نہ قرآن میں نہ باقی کتابوں میں کہ یہ مشتمل ہے قرآن کے تمام معانی پر۔‘‘

[علامه ابن حجرعسقلانی، فتح الباری شرع صحيح بخاری، 10 : 198، طبع دارالفکر]

♥فقہائے اسلام کے نزدیک گنڈا تعویذ، دم درود اور جھاڑ پھونک♥

●الاسترقاء بالقرآن نحو أن يقرأ علی المرض و الملدوغ أو يکتب فی ورق و يعلق أو يکتب فی طست فيغسل و يسقی المريض فأباحه عطاء و مجاهد و أبو قلابة...فقد ثبت ذلک فی المشاهير من غير اِنکار و الذی رعف فلا يرقأ دمه فأراد أن يکتب بدمه علٰی جبهته شيْاً من القرآن يجوز و کذا لو کتب علی جلد ميتة اذا کان فيه شفاء ولا باس بتعليق التعويذ و لٰکن يترعه عند الخلاء و القربان.

’’قرآن کریم سے دم (جھاڑ پھونک) کرنا یوں کہ مریض اور (سانپ، بچھو وغیرہ سے) ڈسے پر قرآن پڑھے یا کاغذ پر لکھ کر گلے وغیرہ میں لٹکائے یا پلیٹ پر لکھ کر اور اس تحریر کو دھو کر بیمار کو پلائے اسے عطاء، مجاہد اور ابو قلابہ نے جائز قرار دیا ہے، مشہور ائمہ میں یہ عمل بغیر انکار ثابت ہے۔ اور جس کی نکسیر نہ رُکتی ہو اور وہ اپنے اُسی خون سے اپنی پیشانی پر قرآن کریم کی کوئی آیت لکھنا چاہے تو یہ جائز ہے۔ یونہی مردار کے (رنگے ہوئے) چمڑہ پر لکھنا جب اس میں شفاء (کی امید)ہو جائز ہے۔ اور گلے میں تعویذ لٹکانے میں حرج نہیں، ہاں بیت الخلاء یا بیوی سے قربت کے وقت اتار دے۔‘‘

[الشیخ نظام و جماعۃ من علماء الہند، الفتاوی الہندیۃ المشہور فتاویٰ عالمگیری، 5 : 356، طبع کوئٹہ]

●التميمة المکروهة ما کان بغير القرآن... ولا بأس بالمعاذات اِذا کتب فيها القرآن أو أسماء اﷲ تعالٰی... انما تکره العوذة اِذا کانت لغير لسان العرب ولا يدري... أو شی من الدعوات فلا باس به.

’’مکرہ تعویذ وہ ہے جو قرآن کے علاوہ ہو، ان گنڈے تعویذوں سے شفاء حاصل کرنے میں حرج نہیں جن میں قرآن یا اﷲ کے نام لکھے ہوں۔ اور وہ تعویذات جو عربی زبان کے علاوہ ہوں اور پتہ نہ چلے یہ کیا ہے، ممکن ہے اس میں جادو، کفر وغیرہ شامل ہو جائے۔ مگروہ گنڈہ تعویذ جو قرآن سے ہو یا کوئی دعا ہو، اس میں حرج نہیں۔‘‘

[ابن عابدين شامی، ردالمحتار، 6 : 363، دار الفکر للطباعة و النشر. بيروت]

●اختلف فی الاستشفاء بالقرآن بايقرأ علی المريض أو الملدوغ الفاتحة أو يکتب فی ورق و يعلّق عليه أو فی طست و يغسل و يسقٰی و عن النبی صلی الله عليه وآله وسلم أنه کان يعوذ نفسه و علی الجواز عمل الناس اليوم وبه و ردت الأثار ولا بأس بأن يشدّ الجنب و الحائض التعاويذ علی العضر اذا کانت ملفوفة.

’’قرآن کے ذریعہ شفاء حاصل کرنے میں اختلاف ہے۔ مثلاً بیمار یا (سانپ، بچھو وغیرہ سے) ڈسے پر فاتحہ پڑھنا یا کسی کاغذ میں لکھ کر اس کے گلے وغیرہ پر لٹکا دیا جائے یا پلیٹ پر لکھ کر اور اس لکھے کو دھو کر پلایا جائے۔ اور نبی کریم صلی اللہ علیہ وآلہ وسلم سے مروی ہے کہ آپ اپنے اوپر دم کیا کرتے تھے۔ اور آج لوگوں کا جواز پر ہی عمل ہے اور روایات و احادیث اسی کی تائید میں وارد ہیں۔ اور جُنبی اور حیض والی لفافے میں بند (جیسے چاندی یا چمڑے میں ہوتا ہے) تعویذ بازُو پر باندھیں، اس میں حرج نہیں۔‘‘

[ابن عابدين شامی، ردالمحتار، 6 : 364]

♥علمائے اہل حدیث♥

اس تفصیل سے معلوم ہوا کہ صرف شرک والی صورتیں منع ہیں باقی جائز ہیں۔

[علامه شوکانی، نيل الاوطار، 1 : 345، فصل ردشرک، الرقیٰ والتمائم]

♥علمائے دیوبند♥

امروہہ میں ایک ہندو تھا وہ حضرت عبدالباری سے کمال اعتقاد رکھتا تھا۔ اس نے آپ سے عرض کیا کہ میرے کوئی اولاد نہیں ہے تعویذ دیجیے۔ حضرت نے تعویذ دے کر فرمایا کہ ابھی تو اپنی بیوی کے بازو پر باندھ دو اور بعد تولّدِ فرزند، اس کے بازو پر باندھ دینا۔ تعویذ کی برکت سے اس کے لڑکا پیدا ہوا۔ جب وہ سنِ تمیز کو پہنچا باغوائے بعض ہنود اس تعویذ کو کھول ڈالا اس میں ’’اُڑری بھنبیری ساون آیا‘‘ لکھا تھا۔ پڑھ کر اس نے تعویذ پھینک دیا۔ پھینک کر وہ نہانے کو گیا دریا میں ڈوب کر مر گیا۔

[مولانا اشرف علی تهانوی، امداد المشتاق الیٰ اشرف الاخلاق، ص : 118، طبع لاهور]

♥مولانا مودودی♥

’’بعض احادیث سے یہ بھی معلوم ہوتا ہے کہ ابتداء میں حضور صلی اللہ علیہ وآلہ وسلم نے جھاڑ پھونک سے بالکل منع فرما دیا تھا لیکن بعد میں اس شرط کے ساتھ اس کی اجازت دے دی کہ اس میں شرک نہ ہو، اﷲ کے پاک ناموں یا اس کے کلام سے جھاڑا جائے، کلام ایسا ہو جو سمجھ میں آئے اور یہ معلوم کیا جا سکے کہ اس میں کوئی گناہ کی چیز نہیں ہے، اور بھروسہ جھاڑ پھونک پر نہ کیا جائے کہ وہ بجائے خود شفاء دینے والی ہے، بلکہ اﷲ پر اعتماد کیا جائے کہ وہ چاہے گا تو اسے نافع بنا دے گا۔ یہ مسئلہ شرعی واضح ہو جانے کے بعد اب دیکھیے کہ احادیث اس بارے میں کیا کہتی ہیں۔‘‘ اس کے بعد مولانا مودودی نے وہ تمام احادیث نقل کر دیں جو ہم نقل کر آئے ہیں۔

[مولانا مودودی، تفهيم القرآن، 6 : 558، طبع لاهور]

’’اب اگر دوا اور علاج کرنے کے ساتھ اﷲ کے کلام اور اس کے اسمائے حُسنٰی سے بھی استفادہ کیا جائے، یا ایسی جگہ جہاں کوئی طبی امداد میسر نہ ہو، اﷲ ہی کی طرف رجوع کر کے اس کے کلام اور اسمائے و صفات سے استعانت کی جائے تو مادہ پرستوں کے سوا کسی کی عقل کے بھی خلاف نہیں ہے۔‘‘

[مولانا مودودی، تفهيم القرآن، 6 : 560، طبع لاهور]

♥خلاصہ کلام♥

آج کل بعض لوگ جہاں دیگر بہت سے اسلامی معمولات کو ’’شرک و بدت‘‘ کہ کر لوگوں کے دلوں میں نفرت و نفاق کے بیج ڈالتے ہیں اُن میں ایک گنڈا، تعویذ اور دم درود بھی ہے۔ اسلام میں جہاں بیماریوں کے مادی علاج ہیں یعنی جڑی بوٹیوں اور دوائیوں سے، اﷲ تعالی کے کلام اور اسمائے حسنی اور مسنون و متبرک دعاؤں سے بھی اﷲ پاک شفاء دیتا ہے، ان میں بھی اُسی نے تاثیر رکھی ہے۔ مگر تمام تر تاثیر اس کے مشیت و ارادہ پر موقوف ہے۔ جب چاہے دواء یا دعا سے شفاء دے، نہ چاہے تو نہ دے اس پر کوئی جبر نہیں۔ دواء میں لازمی شفاء ہوتی تو ہسپتالوں سے ہر مریض شفایاب ہو کر نکلتا، بیرون ملک لاکھوں کروڑوں کے مہنگے علاج کرانے والوں کے تابوت نہ آتے۔ وہ چاہے تو معمولی دیسی پڑیا سے شفاء مل جائے، کسی بندہ خدا بھلے وہ کیسا ہی گناہگار ہو اس کی پھونک سے شفاء ہو جائے، چاہے تو دعا کار گر نہ دواء میں اثر۔ یہ متعصب جہلاء ڈاکٹروں حکیموں کے پاس جانے سے تو منع نہیں کرتے، ان کے خلاف نفرت آمیز پروپیگنڈا نہیں کرتے مگر کوئی بندہ خدا اگر کسی بیمار کو اﷲ کے نام و کلام سے دم کرے، تعویذ بنا کر دے، پانی وغیرہ دم کر کے دے اور شفاء دینے والے خدا سے مصیبت زدہ مریض کے لئے شفاء طلب کرے تو جھٹ فتویٰ کفر و شرک جڑھ دیتے ہیں۔ ہم نے اس موضوع پر قرآن و سنت عمل صحابہ کرام و ائمہ امت بلکہ خود معاندین کے اکابر کے فتاویٰ و اقوال سے مزین اس مضمون میں ثابت کیا ہے کہ قرآن و سنت کی رُو سے کلمات طیبات، آیات و آثار سے دم کرنا، جھاڑنا نہ صرف جائز و مستحسن ہے بلکہ قرآن و سنت، رسول اﷲ صلی اللہ علیہ وآلہ وسلم، صحابہ کرام، آل اطہار اور علماء اولیاء امت میں سے آج تک کسی نے اس کے خلاف ایک لفظ نہیں بولا اس کی تائید میں ہم نے ہر مسلک و مذہب کے اکابر کی تصریحات بھی پیش کر دیں۔ اﷲ تعالیٰ مسلمانوں کو شیطانی وسوسوں کے شر سے محفوظ رکھے ان شاء اﷲ اس کے پڑھنے سے بہت سے ذہنی عقدے کشا ہونگے۔

♥واللہ و رسولہ اعلم بالصواب۔